
"М-Жи-Эл Интернэшнл " ХХК-ийн "Глобал Пресс Медиа" төвийн менежер Н.Ариунболд
Дэлхийн бизнес эрхлэгчдийн гарын авлага ч гэгддэг "Блумберг Бизнес Уик" мэдээний агентлагийн амттайхан мэдээллээр Монголын уншигчдыг дайлахаар болсонд юун түрүүнд танд баяр хүргэе. Азтай гэмээр энэ завшааныг ашиглаад таниас асуухад эдийн засгийн "Блумберг Бизнес Уик" мэдээний сүлжээг Монголд нэвтрүүлэх санаа та нарынх уу, эсвэл нөгөө талаас санал тавив уу?
Юуны өмнө "Өдрийн шуудан" сонины нийт уншигчдын энэ өдрийн амгаланг айлтгая. Эдийн засгийн чухал асуудлуудыг хөндөж бичдэг, урьдчилсан байдлаар дүгнэлт хийдэг, маргаашийн чиг хандлагыг тодорхойлж учирч болзошгүй эрсдлээс хэрхэн сэргийлэх вэ, алдагдал хүлээсэн цагт түүнээсээ ангижрах арга зам, гарцыг нь зааж өгдөг "Блумберг Бизнес Уик" сэтгүүлийг дэлхийн бизнес эрхлэгчид гарын авлага, мэдээллийн эх үүсвэр болгон ашигладаг гэдгийг энд онцлон тэмдэглэн хэлэхэд таатай байна. Нөгөөтэйгүүр, Азийн цээжинд орших жижигхэн Монгол Улсын эдийн засгийн байдад зарим талаараа дэлхийгээс хамаарах болчихоод байгаа ийм цаг мөчид бид амьдарч байгаа учраас бизнес эрхэлж буй хэн бүхнийг мэдээллээр хангаж байхыг хүсч. байна. Энэ үүднээс "Блумберг Бизнес Уик" сэтгуүлийг Монголын зах зээлд нийлүүлэхийг хичээсэн. Энэ үүргийг "Сэлэнгэ сервис" ХХК-ийн охин компани болох"М-Жи-ЭлИнтернэшнл" ХХК-ийн "Глобал Пресс Медиа" төв хүлээсэн. Дашрамд өгүүлэхэд, дээрх төв нь дэлхийд алдартай гадаадын хэвлэлийн захиалга, хүргэлтийн ажлыг хариуцан ажилладаг. Энэ шугамаараа бид мэдээллийн маш том зах зээлтэй түншлэх асуудлыг олон жил хөөцөлдөж, энгийн харилцаанаас зах зээлдхамтран ажиллах албан ёсны гэрээ байгуулах хэмжээнд хүрсэн гэж хэлж болно. Ийн зүтгэсний хүчинд бид "Блумберг Бнзнес Уик" бизнес сэтгүүлийн албан ёсны төлөөлөгчөөр ажиллах эрхийг дөрөвдугээр сарын 23-нд авч чадсан.
Үнэнийг хэлэхэд. "Блумберг Бизнес Уик" бизнесийн сэтгүүл бизнесийн тодорхой хүрээнийхэнд эргэлдэх байх. Харин та бүхний зорилго бизнес эрхэлж буй хэн бүхэн захиалдаг гарын авлага нь байгаасай хэмээн хүсч буй нь дамжиггүй. Олны хүртээл болгохын тулд хамгийн түрүүнд юу xийх вэ гэдэг чинь сонирхол татаж байгааг нуугаад яахав?
"Блумберг Бизнес Уик" сэтгүүлийн албан ёсны төлөөлөгчийн эрхийн дагуу захиалагчдад хэвлэмэл эхийг хүргэх болно. Энэ нь үнэ болоод цаг хугацааны хувьд бизнес эрхлэгчдийн ашиг сонирхолд нийцнэ. Түүнчлэн биднээр дамжихгүйгээр www.mgl. mn, www.mcgraw-hill-sales.com хандан захиалан уншиж болно. Гурав дахь хувилбар нь бидний зүгээс сэтгүүлийн гол гол материалыг эх хэлнээ хөрвүүлэн уншигчдад хүргэх явдал. Энд онцолж хэлэхэд, дэлхийд нэр хүндтэй сэтгүүлийг онлайнаар захиалах ажлыг 2000 онд эхлүүлсэн. Үүний үр дүнд уг вэб сайт руу хандан эдийн засаг,боловсрол,агаарын тээвэр, уул уурхай, мэдээллийн технологитой холбоотой мэдээллийг худалдаж авдаг бололцоог монголчуудад олгосон. "Блумберг Бизнес Уик"-ийн монгол захиалагчдын өсөлт судалгаагаар 2005 онд Ази Номхон далайн орнуудын хэмжээнд гуравдугаар байранд явж байсан бол 2009 онд тэргүүлж чадсан. Хүн ам, эдийн засгийн чадавхи, бизнесийн хүрээгээрээ бидэнтэй зүйрлэхийн аргагүй хөгжсөн Хятад, Тайвань удаалж байгаа нь нэгийг хэлэх биз ээ.
-"Блумберг Бизнес Уик" сэтгүүлийн талаар уншигчдад товч танилцуулна уу. Үнэ ханш, хуудас, сэтгүүлийн нийтлэлийн бодлого гээд л?
Дэлхийд алдартай бизнесийн мэдээллийн агентлаг болох "Mcgraw-Hill" компани "Bloomberg" компанийн нэгдсэн төслөөр "Bloomberg Busi¬nessWeek" сэтгүүлийг гаргаад энэ оны дөрөвдүгээр сарын 23-аас эхлэн дэлхийн уншигчдын хүртээл болгож байгаа. Тодруулж хэлбэл, дэлхийн мэдээллийн зах зээл дэх хамгийн шилдэг компани дундаасаа 130 гаруй хуудастай, зузаан, өнгөтэй, агуулга нь дэлхийн бүс нутаг улс орнуудын эдийн засаг, бизнес, улс төрд дүн шинжилгээ хийсэн тойм, мэдээ мэдээллийг багтаахын зэрэгцээ маргааш юу болохыг урьдчилсан байдлаар хэлж, тайлбарласан байдгаараа онцлог. Үүгээрээ бизнес эрхлэгчдэд гарын авлага болоод зогсохгүй зүг чигийг нь зааж өгч байгаа юм. Үнийн хувьд жилд 50 дугаар гарна, захиалгын үнэ 175 доллар. Дашрамд сонирхуулахад "Bloomberg Business Week" сэтгүүлд ажилладаг 4.2 сая захиалагчтайн дээр 72 оронд өөрийн төлөөлөгчийн газартай гэдгийг хэлэх байна.